Kristen Muslimmisjon (KMM) med ny misjonær til Senegal
1. september 2010
Anette Nordhelle (36) frå Søgne vert frå 1. september 2010 ny misjonær for KMM i Senegal. Ho fekk forbønshandling og kallsbrev under misjonsfesten i samband med generalforsamlinga til KMM på Valderøya 25. – 27. juni 2010. Dette framfor 120 frammøtte.
Ho vil få si teneste hjå den evangeliske lutherske kyrkja (ELS) i Senegal og vil blant anna arbeide med evangelisering. Hovedføremålet til Kristen Muslimmisjon er å nå muslimane med evangeliet i Senegal, India, Indonesia, Israel og i Norge.
Anette er både utdanna som sjukepleiar og har praktisk pedagogisk utdanning. Ho har blant anna arbeida som sjukepleiar ved Haraldsplass Diakonale Sykehus i Bergen, i Kristiansand og Songdalen kommune. Framleis driv ho med nettundervisning (NKI) for elevar i helse- og sosialfag. Ho har også vore lærar ved Kristiansand vidaregående skole.
Sjukepleiarutdanninga si tok ho ved Betanien Sykepleierhøgskole i Bergen. Anette har blant anna studert fonetikk og linguestikk ved universitetet i Bergen, studium i Bibel og misjon ved Fjellhaug Misjonshøgskole og fransk ved Les Cedres. Ho har også teke relevante kurs som islam og misjon frå Ibeto i Sveits, islam ved NIKI, Sharpening Your Interpersonal Skills Workshops frå Fjellhaug Misjonshøgskole og studert bistand / diakoni ved misjonshøgskolen i Stavanger.
Anette har hatt eit ynskje heile livet om å verta misjonær. Etter fleire år no med diverse utdanningar, kurs og arbeidserfaringar fann ho ut at det var på tide å gjera noko med misjonskallet ho har bore på heilt sidan ho var lita jente. Ho er glad i å arbeide med menneske og har likt å engasjere seg i barne – og ungdomsarbeid i kyrkjelyden. Dessutan synest ho det er spanande med andre språk og kulturar.
Ho har budd eit skuleår i Frankrike, samt vore fleire gonger i Ghana, der ho både har vener og «familie». Ho har lært mykje i forhold til dette med å verta kjent med nye kulturar og bruke tid til å forstå og lære.
Sjølv har ho sin bakgrunn i den kristne konservative lekmannsrørsla og seier at misjon alltid må starte med evangeliet sjølv, som er ei Guds kraft til frelse for kvar den som trur på Han. Anette Nordhelle får sanneleg ei utfordring: Muslimane utgjer i dag 41 % av dei menneskegrupper som i dag vert rekna som dei unådde folkeslaga. Kun 1,9 % av verda sine kristne misjonærar arbeidar blant muslimane.
– Islam kjenner ikkje frelsesvisdomen og barnekåret hjå Gud. Islam er nemleg i si grunnhaldning ein lovreligion som ikkje byggjer på nåden i Guds hjarte, seier Anette Nordhelle.
Kristen Muslimmisjon feirar i år 70 år for sitt misjonsarbeid. Kristen Muslimmisjon som tidlegare heitte Den norske Muhammedanermisjon starta då truande menneske svarte på den smerte og naud for muslimane si frelse som ein ung misjonær ikkje kunne skyve frå seg. Misjonsprest Otto Torvik måtte dele evangeliet med muslimane. Organisasjonen vart skipa i Bergen i 1940. Nokre truande kvinner byrja bønneforeining til støtte for Torvik sin misjonsverksemd, og så var misjonsarbeidet i gang!
Anette Nordhelle på talarstolen under misjonsfesten på Valderøy bedehus
Frå forbønshandlinga. Fremst: Rasmus Pollestad (formann), Anette Nordhelle (i midten) og Sigmund Meland (ansvarleg for arbeidet i Senegal).